بدايه الحركه السياسيه المنتظره...البرادعي يعلن تاسيس جمعيه وطنيه لتغيير الدستور

قال د.محمد البرادعي- المدير السابق للوكالة الدولية للطاقة الذرية- إنه اتفق مع عدد من ممثلي القوى السياسية في مصر على تشكيل تجمع تحت عنوان "الجمعية الوطنية للتغيير" يكون هدفها الأساسي إحداث تعديلات دستورية وتحقيق العدالة الاجتماعية.
وأضاف البرادعي -في تصريحات مقتضبة للصحفيين مساء الثلاثاء بعد اجتماع مغلق جمعه مع 30 شخصية من ممثلي القوى السياسية في مصر بمنزله- أن التجمع مفتوح لكل المصريين من كل الجهات، وإنه تم الاتفاق على تكوين لجنة تحضيرية هدفها الأساسي وضع آلية لتنفيذ تعديلات في الدستور الحالي وضمان نزاهة الانتخابات القادمة ثم وضع دستور جديد لمصر.
وأكد د.البرادعي أن مصر تمر بمرحلة حرجة فهناك انتخابات برلمانية في العام الحالي وأخرى رئاسية في العام الذي يليه وهناك مطالبات ملحة بالتغيير، مشيرا إلى أن لقاءه مع القوى الوطنية كان من أجل الاتفاق على السير بطريقة سلمية لإحداث التغيير المطلوب.

شارك في اللقاء ممثلين لكل القوى السياسية في مصر تقريبا مثل د.حسن نافعة المنسق العام للحملة المصرية ضد التوريث، ود.سعد الكتاتني رئيس الكتلة البرلمانية للإخوان المسلمين، ود.أيمن نور مؤسس حزب الغد، ود. أسامة الغزالي حرب رئيس حزب الجبهة الديمقراطية، والكاتبة سكينة فؤاد، ود. محمد أبو الغار،و حمدين صباحي عضو مجلس الشعب ووكيل مؤسسي حزب الكرامة، ود.جمال زهران عضو مجلس الشعب المستقل، ود.عبد الجليل مصطفى القيادي بحركة كفاية، وجورج اسحق المنسق العام السابق لحركة كفاية، والمستشار مصطفى الطويل الرئيس الشرفي لحزب الوفد، ود.يحيى الجمل الفقيه الدستوري، ود.علاء الأسواني الكاتب والروائي، والمستشار محمود الخضيري رئيس نادي قضاة الإسكندرية السابق.

ووصف النائب حمدين صباحي اللقاء للدستور بأنه يتسم بالجدية موضحا أنه تم الاتفاق على آلية للعمل للفترة القادمة تقوم على جمع توقيعات من المواطنين من أجل القيام بتعديلات دستورية، مؤكدا بأنه يشعر بالتفاؤل من نتيجة اللقاء، فيما قال د.علاء الأسواني للدستور بأن سفر د.البرادعي للخارج لن يؤثر على عمل اللجنة خاصة وأن د.البرادعي لن يقيم بشكل كامل خارج مصر، موضحا أن اللجنة ستقود حركة المصريين من أجل تحقيق العدالة الاجتماعية وإحداث التحول الديمقراطي المنتظر

نقلا...عن جريده الدستور

قولى يا مودى ايه رايك تفتكر البرادعى يصلح للمنصب دا ؟
و ايه تفسيرك للى بيحصل ؟ مع الصمت من النظام؟

مبدأيا نفسي اللي يكلمني يقولي يا احمد بس عادي ...انا ومودي واحد =))

والله يا مانا هو البرادعي لما اتكلم واعرب عن اللي عايزه قال فقط انه جاي يغير ويحرك الميه الراكده بقالها اكتر من 60 سنه
بالنسبه لتغيير الدستور والنظام الانتخابي والكلام ده
علي حد كلامه هو قال ان ده هدفه الاساسي وبالفعل بدأ في تنفيذه زي ما انت شايف

وعلي حسب كلامه برضه هو قال انه مش هدفه يبقي رئيس جمهوريه وانما لو حصل والتغيير اللي هو طالبه حصل خلال السنه دي في الدستور وكده والضمانت الكافيه لانتخابات نزيهه والناس طلبت منه انه يترشح هيترشح....

بالنسبالي انا بقه...
انا موافقه جدا في النقطه الاولي ولو عملها فعلا يبقي معلم خاصه ان النظام الحالي نظام يقمع اي حد وادينا شايفين بقالنا 30 سنه...

انما لو اترشح مقدرش انتخبه الا لما اعرف برنامجه الانتخابي واقرر اذا كان واقعي ولا لا...
وهقدر احاسبه ولا لا...
وانه فعلا مش هيقعد اكتر من فترتين متتاليتين...
ساعتها لو كل ده اتاكدت منه اكيد هنتخبه لانه هيبقي الافضل...ولازم الشعب كله ينتخبه مش انا يس

وانت يا سيدي مانا ؟؟...ما رايك

و اللهى هو فى كلام كتير قاله كان كويس
لكن انا مش عاجبنى نظامه و كمان حاسس ان فى ناس كتير بدات تستغله و تعمله بطل شعبى او فارس جاى يحقق لهم امانى بعيده
مع العلم انه كان بعيد عن مصر لسنوات و سنوات يعنى مشاكل مصر واحد زينا عايشها هو اللى بيحكيها له
و كمان عندى احساس انه بيتحرك من وراء ستار
انا مش مقتنع بيه دا راجل علم ازاى هيدير منصب سياسى بحت ازاى هيضع يده على مقاليد الحكم ان لم يكن سياسى متمرس و اللى حوليه دول فاكرين انهم هيستخدموه لاغرضهم على اساس انه لا علم له باللى بيحصل م تحت لتحت
انا شايف انه قال كلام كويس مره و يمكن مكنش عرف هو قال ايه لكن الكلام دا مس ناس كتير لانهم بيحلمو انه يتحقق و هو قال اللى شايفه بره فجاه كدا زى ما عملنا مع جدو عملنا معاته و طلعناه و على فكره انا خايف لينزل على جدور رقبته
دا رايى قبل ما اتكلم كلام عملى فايه رايك

اوضحلك بس هو مكنش منصب علمي
هو كان منصب سياسي ...هو قااااااااااااضي بالوكاله الدوليه للطاقه الذريه وتدرج لحد ما وصل للمنصب ده
وبان من لقائاته ان رجل هادي وفكره متزن ومش طمعان في حاجه اكتر من انه عايز يغير ولو رشح نفسه هيبقي بناء علي رغبه الشعب
وحتي لو اترشح ما احنا اللي هنختار ...لو معجبناش مش هنختاره
كمان...انت عارف لما الواحد يبقي فاقد الامل خالص...
بقاله 30 سنه في كبت وظلم وقهر ونظام مش علي مستوي البلد مش هنخسر حاجه لو ضيعت كمان خمس سنين نجرب حد تاني!!

ازاي الخوف وصلني
لدرجه اني مخفــش
.......
وجراج الاوبيرا اتهد
انا ليه خايف ع السد
وازاي بضحك من قلبي
وانا قلبي واخدها بجد

مفيش مشاكل
انا معاك اننا لازم نشوف دم جديد
دم عنده روح التغير و التقدم حد يعرف ازاى يحول مصر فى فتره زمنيه معينه من حاله لحاله
حاجه كدا زى قائد الشعب كله يكون بيحبه و يثق فيه يعنى من الاخر واحد يراعى ضميره و يعمل حاجه لوجه الله
البرادعى يمكن انا مختلف شويه على شخصه كرئيس و انا معاك انه اصلا مش رجل علم فى اساس هو رجل قانون بس هو علشان يرشح نفسه لازم يزيل الماده اللى فى الدستور اللى هيا بتنص ان اللى يرشح نفسه لازم يبقى على الاقل حزبى ومع رفضه للانضام لاى حزبه و قوله (لما واحد زيى ميعرفش يرشح نفسه دى تبقى طامه كبرى )
الكلمه دى حسستنى بالتكبر شويه المهم انه علشان يزيلها لازم مجلس الشعب يوافق يعنى اغلبية الاعضاء اللى هما من الحزب الوطنى و الاخوان و اعتقد ان الاتنين مش من مصلحتهم ان البرادعى يبقى رئيس للجمهوريه علشان كدا انا حاسس انه بيدن فى مالطه بس كويس اهو بيتشهر و خلاص و ربنا معاه

هو مبيطالبش بمعجزه يعني يا مانا
دا الطبيعي بتاع اي بلد ديموقراطيه في الدنيا
من حق اي حد مستقل انه يترشح للرئاسه
مهياش معضله يعني ولا هو بيفتكس وبيقول كلام من دماغه
احنا اللي متعودين علي القمع والظلم والقهر بس
مش مستعدين لتقبل اي جديد
دي حاجه لازم نعترف ان النظام رسخها في فكرنا خلاص للاسف

وهو رافض الانضمام لحزب لانه اصلا معترض علي الجو السياسي الاشبه بمسرح العرائس الموجود حاليا...احزاب معارضه زي قلتها واستحاله بالوضع الموجود ده ان اي حد منهم يترشح الانتخابات الجايه
في شروط تعجيزيه ميقدرش عليها الا الحزب الوطني فقط
عرفت بقه ليه؟؟

و اللهى انا اكتر حاجه مش عجبانى فى البرادعى طريقته و اللى بيحسسنى زى ما يكون امير كبير و احنا نطيع هو فى الاول قال اعملو كذا و كذا و انا هرشح نفسى مفكرش ايه اللى ممكن يتريب على كدا مصر كدوله فيها حاجات داخليه كتيره ممكن مجرد الغاء اى قانون من قوانين الدستور ممكن تولع فيها حريقه
مصر فى التسعينات كانت بتعانى من ويلات الارهاب و اكتر من كدا مثلا قانون زى الطوارى مع علمنا الكبير بعيوبه لكن نقدر نقول انه ظبط شوية حاجات
يبقى علشان اقول نلغى القانون دا يبقى عندى بديل له اقترحه على الاقل مش اقول انا نفسى الغى كذا و خلاص
ثم الناس دلوقتى راحه على البرادعى طيب هيعملو ايه مع عمرو موسى و انا شايف انه ممكن يكون اولى منه
طيب لو احمد زويل مع ان موقفه مش واضح اوى نفترض هو كمان لو رشح نفسه يبقى فكرة الاصلاح واحده و اتجزات على اكتر من واحد
منصب رئيس الجمهوريه مش مجرد افاره كويسه نقعد نطبل ليها طب ما كلنا عندنا افكار زى البرادعى و افضل و مبارك عارف كل دا و الناس كلها عندها افكار لو اتحققت ممكن تحل مشاكل فى كتير شايف ان ملهاش حل
البلد مش بتعانى من مشكله سياسيه فى المقام الاول انما بتعانى من مشاكل تانيه اشرس بتمزقها من جوه
و المرشح الذكى هو اللى يخاطب الناس اللى تحت دى
البرادعى اللى حوليه دلوقتى السياسيين و المعارضه لكن الوظف البسيط زى ولدى و والدك او عمك او اى حد ميهمهوش الدستور ولا البتاع المهم عنده انا هحسس ازاى بالفرق
الكلام هيطول يا ابو حميد و انا معاك

خلاص اوعدك اني هرد عليك بس مش نااااااو
لازم ننام بقه عشان نصحي بكره
اوعدك بالرد وبمناقشه هكسبها ان شاء الله لانه واضح انك بتحب بابا حسني اوي

اسمحلي اختلف معاك جدا يا مانا في كتير من كلامك معلش...
يعني ايه والدي ووالدك ملهمش دعوه بالدستور وتغييره...
امال ايه بقه يهمهم...هي مش بلدهم ولا ايه؟؟
ولا هي بقت بلد الناس الكبار بس؟؟
ما تغيير الدستور معناه انه هيسمح بحاجات افضل من اللي موجوده تغيير فكر...تغيير دم...
هنجيب الناس اللي عندها افكار دي ونحط كل واحد في مكانه ويشتغل
ولا هو لازم يبقي رئيس جمهوريه يعني عشان يشتغل بكفائه ويغير المنظومه ويدور العجله ...

للاسف احنا اتعودنا علي كده...اننا نستني التغيير يجي من فوق من الريس حبيب الشعب اللي حاسس بهمومنا انما الحاشيه اللي حواليه يا عيني هي اللي مبوظه البلد..
بنسمع الكلام ده من ايام الملك فاروق لحد دلوقتي....والنتايج هي هي...

والمطحونين لسه مطحونين ..والفقرا لسه فقرا..والطبقه المتوسطه انقرضت...كل ده واكتر من اللي بنشوفه بسبب سياسات غلط سواء كانت داخليه ولا خارجيه
وهنروح بعيد ليه..مش انت حضرت محاضره د/ ابراهيم وسمعت؟!!
مفيش اداره كويسه للاسف....

لا ارجوك البلد فعلا محتاجه تتغير ...محتاجه يبقي في نظام وفكر ورؤيه افضل من كده وباكدهالك اهو بغض النظر عن مين اللي هينفذها...المهم انه يكون مصري وهيلتزم بيها

سواء بقه حزب وطني اي حزب من احزاب المعارضه الخايبه دي او اي مستقل مادام تيار شرعي...المهم ان يكون في ادله وبراهين انه يقدر يعمل ده في الوقت المحدد له..

ولا انت ايه رأيك...انا غلط؟؟

هههههههههههههههههههههههههههههههههههههههههههههههههههه
بدايات التشويه الاعلامي للبرادعي كانت بادئه من المنتدي هنا

ههههههههههههههههههههههههههههههههههههههههههههههههههههههههههههههههههه