eng_mody إدارة المنتدى
عدد الرسائل : 3631 العمر : 33 تاريخ التسجيل : 24/07/2008
| موضوع: عماره" 3و"....للكاتب الساخر عمر طاهر السبت فبراير 20, 2010 10:13 pm | |
| في الدور الأول أصحابي
وجيراني قاعدين في التاني
وأبويا وأمي في الرابع
وأنا ساكن في الدور العاشق
أنا ساكن في الماضي الغامق
أنا سافل بحب الدنيا
هربان من حكم بتأبيدة
في الدور الأول سألوني
عن اسمي وعن سر جنوني
عن شجرة تحت الشباك
عن جردل علي سور البير
ع الخطة الخمسية الجاية
عن بنت بتلمع في عينيا
عن وردة وشادية وفيروز
عن لحظة باتحول فيها
من ميكانيكي إلي أراجوز
عن قهوة سكر مضبوط
عن شلة رايحين الحفلة
وماحدش راجع مبسوط
عن جرحي اللي مابفتحوش
عن صاحب رمّة ومغشوش
نزلني ف ماطلعتوش
عن نمرة تليفون البيت
في الدور التاني سألوني
عن واحدة بتجيلي الشقة
عن أزمة حنية مفاجئة
ف شباك صالة المفتوح
عن ضحكة ما بتقولش كتير
وقميص اتعلق مجروح
وسلام متوتر مكسوف
وقالوا لي إحنا عارفينك
قلت لهم طب ما أنا معروف
في الدور الرابع ربّوني
بالخمسة علي وشي ادوني
في الشقة لوحدي وسابوني
وقالوا لي ما تفتحش الباب
في الدور الرابع بعتوني
أتعلم وأرجع بشهادة
ما رجعتش بس اتعلمت
اتعلمت لأني آمنت
وبادفع تمن اللي اتعلمته
وغيابهم عني اتحملته
وغيابي عنهم بقي عادة
أمي قالت لي بطّل قهوة
وقهوة أبويا دايماً سادة
وأنا راجع للدور التاني
في الدور التاني يا جيراني
أنا بكرة ماشي ومش راجع
يا معادي ليلك بقي ساقع
بقي أسقع من الوحدة ونارها
أنا صاحي في ليلها ونهارها
فكرني حلوها بمرارها
وباصرخ بس ماحدش سامع
وأنا راجع للدور الأول
في الدور الأول أرشيفي
رجالة مقاسمها رغيفي
مقاسمها تنويحة خريفة
مقاسمها ورقة بعشرين
عدوية ووردة وجاهين
في الدور الأول أصحابي
وأقربهم ليا الخاينين
وأنا ساكن في الدور العاشق
أنا ساكن في الماضي الغامق
أنا سافل بيحب الدنيا
هربان من حكم بتأبيدة
وباواجه ربنا بإيماني
وباواجه نفسي بقصيدة. ............................................... نشرت في الدستور الخميس الماضي | |
|
eng_mody إدارة المنتدى
عدد الرسائل : 3631 العمر : 33 تاريخ التسجيل : 24/07/2008
| |
يسرا مشرفة قسم الموضوعات العامة+القسم الديني
عدد الرسائل : 4501 العمر : 34 تاريخ التسجيل : 26/06/2008
| |
eng_mody إدارة المنتدى
عدد الرسائل : 3631 العمر : 33 تاريخ التسجيل : 24/07/2008
| موضوع: رد: عماره" 3و"....للكاتب الساخر عمر طاهر الأحد فبراير 21, 2010 8:00 pm | |
| يعني..هو الشعر العمودي بتاع عمر محير شويه بس يتفهم بعد قرايه مره واتنين... محتاج بس يتقري اكتر من مره لانه مبيحطش المعني مباشره بيحط المعني في تشبيهات كده غريبه... هحاول انزل قصيدتين كمان كده برضه له عندي يمكن تقدرو تتفهمو اسلوبه... | |
|