كام كلمه كده ع الماشي...

■ الشعوب فى العالم نوعان: نوع تقرر مصيره انتخابات حرة نزيهة حقيقية وشريفة، ونوع تقرر مصيره جملة من ست كلمات «بابا عايز أتكلم معاك عن الرئاسة».

■ شكراً للمعلم توتو ابن مصر البار الذى فضح بتلقائيته تفوق مسؤولى السفارة المصرية فى واشنطن على أنفسهم، حين قرروا أن يكونوا على مستوى حدث زيارة الرئيس مبارك إلى واشنطن، وبدلاً من أن ينظموا له لقاءات صادقة وحقيقية مع المصريين المعارضين لسياساته والمعترضين عليها والطافشين منها، قرروا أن يستعينوا بالجزار محمد عبدالمعطى حسنين، وشهرته توتو، ليحيى زفة حب بالزمر والطبل أمام مقر إقامة الرئيس فى فندق فورسيزونز واشنطن، ثم أمام البيت الأبيض وحديقة لافييت.
توتو الذى هاجر إلى أمريكا عام ١٩٧٦ ليعمل كموسيقى اضطرته الظروف أن يعمل فى مسلخ لتقطيع اللحم لكنها لم تفقده غريزته التطبيلية التى نولد جميعا بها فى هذا الوطن المبتهج.
توتو كما كشفت زميلتنا هبة القدسى يتمتع بعلاقات حميمة مع مسؤولى سفارتنا فى واشنطن لدرجة أنهم «فى السفارة عارفين إنى عايز أقدم أى حاجة لبلدى»، ولذلك أخذ توتو إجازة عارضة من المسلخ الأمريكى لأنهم «فى السفارة» قالوا له «مصر محتاجالك يا توتو»، توتو لبى النداء وقام بعمل ديسكاونت جامد لمصر ورئيسها المحبوب،
ثم حصل على نصف أجره المتعارف عليه، ٤٠٠ دولار فقط للتطبيل والتزمير طيلة يومين، والله يا بلاش، بعض الصحفيين الحكوميين لدينا يطبلون طول الشهر بربع هذا المبلغ. كنت أتمنى أن نعرف من توتو كيف يمكن لملايين الشباب الذين لم يحالفهم الحظ فى نيل فرص العمل فى برنامج الرئيس الانتخابى أن يسافروا للتطبيل والتزمير مع توتو، خاصة أن الزعل الذى كان بيننا وبين الأمريكان راح لحاله،
وسيتردد مسؤولونا كثيراً على واشنطن فى الفترة المقبلة من أجل تضبيط المسائل، وعندها سيقبض شبابنا من سفارتنا بالدولار بدلاً من قيامهم بالتطبيل المحلى مقابل وجبات من كنتاكى ومؤمن. السؤال الأهمّ (من الهم والأهمية معاً) لماذا يصرف الشعب المصرى دم قلبه من أجل تنشئة وإعداد وتربية دبلوماسيين يمثلون مصر أمام العالم إذا كان بمقدوره أن يستغنى عنهم بكدابين زفة من شارع محمد على، ده حتى أرخص وأشيك؟.

■ سبحان الله يا أخى على هذه الدنيا، عندما يقوم الإنسان بتخليص العشرات من أبناء وطنه من قبضة خاطفيهم يصبح بطلاً، وعندما يسعى لتخليص الملايين منهم يتهم بمحاولة قلب نظام الحكم.

■ الفرق بين القرصان الصومالى والقرصان الوطنى أنك يمكن أن تنجو من القرصان الصومالى.

■ فى عصر يسوده التطرف الدينى والتطرف العلمانى والتطرف النفاقى والتطرف الفسادى والتطرف الجنسى والتطرف الأمنى والتطرف الكروى، لا تتعجب إذا تم رفض الترخيص لحزب الوسط.

■ يعانى صديق حميم لنا من أزمة زوجية حادة اندلعت بعد أن دخلت عليه زوجته قبل يومين وهى تشهر فى وجهه تغطية (المصرى اليوم) لفضيحة استخدام مياه المجارى فى الزراعة، وقالت له متهكمة: عشان ماتبقاش تزعل لما أقولك إن الفاكهة اللى بتجيبها طعمها (خـ..).

■ أتعجب من الذين لم يصدقوا أن وزير الإعلام أنس الفقى يمكن أن يترك مهامه الوزارية ليقوم بتضبيط سلك شاشة بلازما قبيل حوار جمال مبارك مع شباب الفيس بوك، ظن هؤلاء أن سيادته كان يعتدى على اختصاصات الكهربائية، ناسين أن ذلك يتسق مع دور وزارته «التنويرى»، فضلاً عن كونه اعترافاً بأن حوار جمال مبارك على الفيس بوك لم يكن عملاً سياسياً بل كان عملاً مسرحياً.

■ يتعلم الصحفى فى كلية الإعلام كيف يقوم بتغطية أخبار بلاده وشعبه، لكنه عندما يعمل فى الصحف الحكومية يتعلم كيف يقوم بالتغطية عليها.

■ قال لى صديقى الذى يكره القراءة إنه لا يفهم موقفى المعارض للتوريث، وعندما طلب منى أن ألخص له موقفى فى أقل عدد ممكن من الكلمات لأن دماغه «واجعاه»، طلبت منه أن يتخيل أن النظام الجمهورى سيكون مصيره لا قدر الله مثل مصير مسرح نجم فى الدقى بعد أن قام الفنان الكبير محمد نجم بتوريثه لابنه شريف نجم.

■ جرعات الصدق المركزة التى حصلت عليها من قراءتى لتغطية الصحف الحكومية لزيارة الرئيس مبارك إلى الولايات المتحدة الأمريكية، ستجعلنى لن أندهش أبداً إذا فتحت الصحف الحكومية يوم السبت القادم ووجدت فيها عنواناً رئيسياً بعرض الصفحة يقول «الشعب المصرى يهنئ شهر رمضان لأن الرئيس مبارك سيصومه».

مقال الكاتب /بلال فضل بجريده المصري اليوم بتاريخ 20 /8 /2009

بسم الله الرحمن الرحيم

موضوع كويس يا احمد

بس اللى انا تابعته فى مختلف وكالات الانباء ان كان فى مظاهرتين فى امريكا موجهين الى الريس اثناء زيارته لامريكا
اولهم كانت من جماعه من اقباط المهجر قام بمظاهره تضم مئات الافراد
على خلفية حقوق الاقباط فى مصر مع معارضة البابا شنوده و كل محاولاته لهدم تلك المظاهره
الاخرى كانت من المصرين العاملين فى جميع ارجاء الولايات المتحده 50 ولايه
خرجو فى ثانى ايام الزياره و توجهو الى مكان اقامة الرئيس ملتفين باعلام مصر و اعلام الترحيب اولا و لافتات ترحيب بالريس ثم بعد ذلك بعض المطالب المطلوبه من الخارجيه لتسهيل عملهم داخل الولايات المتحده و استمرت تلك ايضا الساعات و انتهت
ثم عقد ايضا السيد الرئيس مقابله مع الرابطه اليهوديه و استمع اليهم
فانا بصراحه مش شايف ان مظاهرة المصرين امام مقر الرئيس بدافع مالى او منتظرين من وراءه شى اطلاقا
و الدليل على ذلك عندما كان الرئيس يقوم بعملية الغضروف لم تكن الحشود تنتهى من امام المستشفى
و ليس تلك الحشود مصرين فقط انما عرب ايضا على اساس ان مصر هى الشقيقه الكبرى
و رئيسها هو الكبير فى المنطقه

اقتباس :: على اساس ان مصر هى الشقيقه الكبرى و رئيسها هو الكبير فى المنطقه

ههههههههههههههههههههههههههههههههههههههههههههههههههههههههههه
الظاهر يا مانا انك مش من البلد دي ...او مش متابع
مش هطول في الموضوع ده بعينه كتير..وان احنا الدوله الكبري في المنطقه والكلام الفاشل اللي بنقعد نضحك بيه علي بعض ده...واللي تلاقي كل اعلام دوله موجه لترسيخ ان دولته هي الدوله الكل في الكل واللي الذبانه متعديش غير باذنها..
انا هلحقك بمقال جامد حالا اهو..وارجوك متلطمش من اللي هتقراه...
ساعتها هتتاكد ان كلامي صح..
الفلوس مع المصريين بتعمل اي حاجه..

اقري كده وقول رأيك...شوف مين بيعملوا ايه ولمين؟

المفروض ألا يُسأل الكاتب عن مصادره، ولذلك دعنى أحتفظ لنفسى بمصدر هذه الشهادة التى أنقلها لك اليوم.

«أكتب لك هذه الرسالة بعد أن قضيت يوماً كاملاً داخل الأمانة المركزية للحزب الوطنى بدعوة من أحد زملائى الملتزمين حزبياً، والذى عرض علىّ الذهاب معه على أساس يعنى إنترنت ببلاش وأكل ببلاش وتكييف ووجه حسن، كل ذلك مقابل أن نقوم بعمل أكبر عدد من البروفايلات بأسماء مختلفة على الفيس بوك لنشترك بهم فى جروب شارك مع جمال مبارك فى حوار الشباب المفتوح، أقصد الحوار طبعاً، المهم وافقت ورحت وكان اليوم بالنسبة لى أشبه بفيلم به الكثير من المشاهد التى سأحاول أن أروى لك أهمها.

المشهد الأول: يدخل المهندس أحمد عز، للرجل هيبة، قصير آه لكنه جبار، بدأ كلامه قائلاً: «إزيكو ياشباب عايز أكلمكو شوية عن مفهوم الفكر الجديد، إحقاقاً للحق، وبرغم إنى كده هازعل إنسان غالى عندنا بس لازم تعرفوا إن جمال مبارك هو صاحب الشعار ده، وهو مابيحبش يقول بس ده حقه علينا»، بعد كده قعد يرغى شوية فى الفرق بين سياساتهم وسياسات البلد زمان أيام عبد الناصر،

طبعاً لو عندك ذرة احترام لعبدالناصر هيجيلك سكر أو ضغط أو تقع مشلول من كلامه، بعد كده ابتدا يتكلم عن الأداء البرلمانى لأعضاء الحزب، وقعد يحكى عن فضايح نواب المعارضة اللى معاه فى المجلس من كل التيارات، عشان يثبت إن الكلام الكويس اللى بنسمعه عنهم مش حقيقى، أنا شخصياً أصبت بإحساس يا عزيزى كلنا لصوص.
المشهد الثانى: يقف الدكتور محمد كمال فى القاعة ويذهب له شباب الحزب بأوراق كتبوا فيها الأسئلة التى من المفترض أن يجيب عليها جمال مبارك على الهواء، المضحك أن الدكتور كلما كان يتلقى سؤالا يقول لصاحبه: لا بلاش خد السؤال ده أحسن،
واضح أن الأستاذ جمال مابيحبش أى أسئلة من بره الكتاب، بعدها جاءت مرحلة تصوير الأسئلة، وللأسف مستوى شباب الحزب جعل الدكتور كمال يكتب صياغة الأسئلة أيضا، وكان يضعها على اللاب توب الذى يقوم بتصوير أصحاب الأسئلة، أنا بصراحة كانت أول مرة أشوفه، قصدى اللاب توب أبو كاميرا،

قابلت الدكتور مشكلة فى الخلفيات التى يفترض ألا تكون واحدة لكى لا يظهر أن الموضوع متطبّخ، ظل الدكتور يلف فى القاعة بلاب توبه لتصوير الأسئلة التلقائية لدرجة أنه اضطر أن يصور أحد الفيديوهات فى الحمام، بالمناسبة كانت هناك بنت موجودة طلبوا منها أن تصور سؤالاً بالحجاب ومرة من غيره على أساس أن ماحدش هياخد باله، والبنت رفضت خلع الحجاب، قررت أن أخرج من القاعة لكى أشرب سيجارة قبل ما أتشل لقيت المشهد الثالث، حيث كان يتم تضبيط القعدة التى ستقام لجمال مبارك يوم الأربعاء،
وجدت شخصاً يرتدى بدلة وكرافتة متشعلق تقريباً على كرسى وبيضبط حاجة فى الشاشة البلازما المعلقة فى المكان، أنا قلت الراجل ده أنا أعرفه، طلع مين، وزير إعلام مصر شخصياً بيضبط سلك الشاشة التى سيجلس عليها جمال مبارك.

طبعا أنت لاتنتظر منى الآن أن أقول لك كلاماً من نوعية بقى هى دى الناس اللى بتحكمنا؟، فأنت أدرى بهذا الكلام، أنا بس أريد أن أسألك: تفتكر قبل أن يمسك هؤلاء الناس الحزب الوطنى كان ممكن أسامة الباز ولا كمال الشاذلى يدخلوا ياخدوا حوار فى الحمام من عيل كتبوا له السؤال،
هل كان صفوت الشريف سيقف لتضبيط أسلاك فى قاعة، واضح إن الأيام السوداء اللى جايه هتخلينا نترحم على صفوت الشريف والشاذلى واللى كانوا معاهم، بالمناسبة عايز أقول لك إن معايا تسجيل لمحاضرة عز باشا، ومصور ٣ فيديوهات لمحمد كمال وهو فى الحمام بيصور سؤال هيتسأل لجمال مبارك، لو عايزهم إبعت لى عشان أحملهم وأبعت لك اللينك لأنى نزلتهم على النت، بالمناسبة الأكل كان من سيلانترو، كان عبارة عن وجبتين كل واحدة تعمل لها خمسين جنيه، مش وحشين والله».

آه يا عزيزى أنا مثلك لا أعرف إلى أين سيذهب بنا جمال مبارك والذين معه، لكننى أعلم جيدا من الذى أوصلنا إلى جمال مبارك والذين معه، وأعلم أنه لولا صفوت الشريف والذين معه، لما كان هناك جمال مبارك والذين معه، ياسيدى حلال عليك اللى أكلته، وربنا يعين مصر على ما ستشربه.

دي مقاله بلال فضل برضه يوم 15/8 اللي فات...
شوف السياسه عندنا ماشيه ازاي
اللي بقالهم اكتر من 50 سنه ييطلعوا الانتخابات 99 %
واللي بيعملوا كده دلوقتي
ميقدروش يطلعوا المصريين اللي في امريكا كلهم يطلعوا بالاحضان ويبوسو الريس

غير صورتك يا مانا ومتستفزش نفسي الضعييفه

ههههههههههههههههههههههههههههههههههههههههههههههههههههههههههه
الظاهر يا مانا انك مش من البلد دي ...او مش متابع

اللى انا اعرفه انى من السنطه و السنطه فى الغربيه لكن الجديد بقى ان الغربيه مش من البلد دى امال منين ؟؟؟!!!!!!!!!

اما بقى بالنسبه لمتابع فاعتقد انى متابع جداو يمكن اكتر منك لانى اول حاجه بعملها اول ما بفتح الكمبيوتر و قبل ما افتح المنتدى نفسه
بلقى نظره عامه على جميع الجرائد المعارضه قبل الحكوميه مش باخد معلوماتى من جريده واحده بس زى المصرى اليوم لكن بجانبها (الجمهوريه الاخبار .الاهرام .الشعب .الوفد .الوسط .الاسبوع.البديل.المصريون .المساء ...........دا بجانب العربيه و الجزيره و bbc>cnn)
تقدر تقول ان دا بقى ادمان عندى متابعة جميع الاخبار و من جميع الزوايا يعنى متابع جدا و كمان من البلد دى
لكن دا مش موضوعنا

مش هطول في الموضوع ده بعينه كتير..وان احنا الدوله الكبري في المنطقه والكلام الفاشل اللي بنقعد نضحك بيه علي بعض ده...واللي تلاقي كل اعلام دوله موجه لترسيخ ان دولته هي الدوله الكل في الكل واللي الذبانه متعديش غير باذنها..

دا مش كلام فاشل يا احمد .......انتا بقى مش عارف ثقل بلدك فى المنطقه فدا نقص معلومات عندك
مفيش دوله فى المنطقه تقدر تزايد على دور مصر من اكثر من 100 عام و اكيد تعرف عندما حاولت دويلة قطر ان زايد و تعيب فى مصر ماذا فعلنا بها
تقدر تقولى ليه اوباما وجه خطابه من القاهره
ليه الاداره الامريكيه اول دوله تتشاور معها تكون مصر
ليه البحرين اول ما هددت ايران بضربها استنجدت بمصر فذهب اليها الرئيس مبارك ثانى يوم من التهديد
هل تستطيع اى دوله اخرى ان تتكبد تلك المشاق فى جمع الشمل الفلسطينى مره اخرى
من قام بالمصالحه بين الجزائر و تونس

لكنى لا ادافع عن مصر تقدر تدخل على اى منتدى من المنتديات العربيه السياسيه تتحاور مع الاخوه العرب و انتا هتعرف ازاى مصر بتحترم كاكبر دوله فى المنطقه

نيجى بقى للمقال التانى دا
انا لا املك انى اصدقه او اكذبه لانى لم اشترك فى الحوار مع جمال على الفيس بوك
قد يكون صحيحا و يظهر مدى الفساد السياسى
و قد يكون مجرد فرقعه اعلاميه ايضا
لكن حوار جمال على النت من وجهة نظرى و وجهة نظر الكثير من الساسه كان فاشل لسببين
1-تحاور جمال مبارك مع شباب الحزب الوطنى فقط و لم يعطى الفرصه لكثير من اشباب الدخول لسواله
2-استخدام جمال مبارك النت فى حد ذاته يعتبر خطا حيث انه كان عليه عندما يريد ان يتحاور مع الشعب ان ينزل اليه لان معظم الناس لا يستخدمون النت او الكمبيوتر نفسه زى ابويا و ابوك و جدك و جدى و الكثير منا

لكن هذا المقال ان صدق يوضح ان هناك فساد فى النظام
نعم النظام به بعض الفساد لكن اليس نحن ايضا من اوصلنا حياتنا الى ذلك الفساد
عندما تقبل ان تعطى رجل رشوة لينهى لك مصلحه اليس هذا فساد
عندما تقبلها اليس هذا فساد
عندما تتوسط لاحد ليشغل منصب ليس من حقه اليس هذا فساد
عندما نرى الاشياء السيئه تحدث من حولنا فلا نقول شيى اليس هذا فساد
عندما نرى نظامنا يدخله الفاسدون و يسيطرون على موارده الاقتصاديه و نظل صامتين اليس هذا فساد
ساعتها هتتاكد ان كلامي صح..
الفلوس مع المصريين بتعمل اي حاجه..
ايه رايك انتا احنا وصلنا لكد ازاى

نحن من اوصلنا النظام لما عليه الان
طيب دلوقتى انتا مش عجبك النظام الحالى او سياسة البلد و دى حرية شخصيا لا يناقشك احد فيها لكن قول لى هل عندك احد يستطيع ان يدير تلك البلد بعد مبارك
اننى لم اقل ان جمال افضل واحد يدير البلد و اخترة واحد تانى
انتا لو عندك واحد تستطيع ان تقول هذا الرجل لو نزل الانتخابات انا هنتخبه تقولنا عليه و يكون ليك الف تحيه

غير صورتك يا مانا ومتستفزش نفسي الضعييفه

يا نهار ابيض مش عجباك صورة الريس طب انتا بقى حاول تقوى من نفسيتك الضعيفه دى علشان تقدر تواجه الناس دى
انا بحب الراجل دا لانه عمل كتير
بالطبع تتذكر حال مصر بعد وفاة السادات و كيف كان حالها الاقتصادى و الديون العسكريه و الصراعات بين قوات الامن و الارهابيون و المخدرات
كيف قضى ذلك الرجل على كل هذا
قدر يبنى من الجيش المصرى اقوى جيش بالمنطقه و سلحه باقوى الاسلحه و خصص ربع ميزانية مصر لذلك الجيش حتى اصبح الجيش المصرى يحتل المرتبه الثامنه عالميا بعد البلاد التى عندها اسلحه نوويه
انظر الى كم المدن الجديده التى ظهرة فجاه
كان عصر السادات لا يخلو من الصراعات و المعارك الطاحنه خاصتا فى الصعيد و ايضا فى الدلتا و القاهره لكن استطاع ذلك الرجل بحكمته ان يحيل كل ذلك الى هدوء
كيف يحترمه العالم كله و يتطلعون للحديث معه
كيف يفرض رايه و يدعمه بالبراهين فى اى لقاء تلفزيونى
كيف يسعى فى اى سفر خارج مصر فى اصطحاب وزير الصناعه و التجاره لعمل مشاركات اقتصاديه
اذا كان هناك نظام فاسد فلا يعنى ذلك فساد ذلك الرجل
الصوره ثابته لغاية ما ازهق منها و بعد كدا مكن اغيرها

ههههههههههههههههههههههههه

ايه يا مانا هو موضوع مزايدات ولا ايه ..
ما انا عارف يا عم انك من السنطه وانك من الغربيه واللي متعرفهوش بقه ان انا عارف ان انت معانا في هندسه طنطا ..

يا مانا هي مزايده علي مين اللي بيتابع اكتر علي قدر ماهي انت بتابع ايه...اناقعدت 6 سنين اقري الجرايد الحكوميه دي لحد ما بقيت اتةقع الكلام اللي بيكتبوه...
شايف الفساد حواليه في كل حته ومبقراش عنه اي حاجه...بقرا ان الحياه حلوه وجميله والناس ماشيه مش عارفه تودي الضحك فين...

والحقيقه ان الغم مالي قلوب المصريين والفقر واكلهم من تحت لفوق والمستفيد واللي ماصص دم الشعب بجد شرذمه متعلقه بالنظام زي عز وامثاله كتير من الوصوليين وبيغطي علي كل ده اعلام موجه لتخميد همم المصريين...

اما بجد يا مانا لو انت متابع فعلا القنوات اللي انت بتقول عليها دي لو تشوف هم بيقولو ايه لما يتمل مؤتمر قمه عربي بره القاهره وشرم الشيخ هتعرف انه نفس الكلام اللي بنسمعه عندن..والكلمه الشهيره اوي
وهذا يعكس مدي اهمبه دور-اسم الدوله- في المنطقه...

طب ما اوباما راح السعوديه قبل ما يجي مصر..عرفت في السعوديه قالو ايه؟؟
اوباما قبل ما بروح مصر جه السعوديه لانها الدوله الاهم في المنطقه..واديك بتشوف المزايدات اللي بتطلع من البحرين...

يا ابني دا حتي الفن اللي كنا فيه ياما هنا وياما هناك واحنا هوليود الشرق..بقوا يزايدو علينا فيه...

اما المقال التانيب انا مصدقه 100 % لاني بشوف كتير زيه قدام عيني..هكدبه ليه؟؟
ولو صدقته وهو غلط يبقي العيب علي الدوله اللي اتعودنا منها ع الفساد...

واذا كانت هذه الصوره المباركه مريحاك..سيبها يا عم وظز في نفسي الضعيفه

الفقر فعلا بقى فى كل مكان
انتا متعرفش مدى الغضب اللى بكون فيه لما بشوف حد محتاج او حد بيشحت فة موقف او فى اى مكان
مصر فيها فاسددين ........ايوه و اكبرهم عز دا
الراجل دا حصل ليه موقف زباله مش بقبله من ساعتها
طبعا انتا عارف قانون الضرائب العقاريه
المجلس حب يعفى منزل العائله من دفع الضريبه و كانت اغلبيه موافقه و الناس ثقفة للاقتراح دا
و فجاه
قام اللى اسمه عز دا و قالهم ايه فى ايه .......فى ثانيه اتقلبت الاغلبيه اقليه
فدا نموذج للفساد و المصلحه الشخصيه
الناس عيزه واحد زى عبد الناصر يحسسها انهم عيشين فى بلدهم فعلا
و يوزع ليهم خير البلد
و ميخبيش عنهم حاجه
الناس محتاجه تحس بالامان اكتر من كدا
ربنا يستر
جميع الاحصائيات توكد حاجه واحده ان الشعب المصرى على مشارف ثوره عارمه على الحكم

انا مش معاك اطلاقا في موضوع الثوره ده...احنا كشعب مش من صفاتنا الثورات او التغيير بالقوه..لو الحاجه متغيرتش من نفسها مش هنتغير..
احنا اتعودنا نبقي كده "اشربنا الخوف" لدرجه اننا منقدرش حتي نقول لا ضد مدير فاسد او حاكم ظالم...

اقتباس :: زى عبد الناصر يحسسها انهم عيشين فى بلدهم فعلا

طبعا مش انا اللي هقول عبد الناصر حلو ولا وحش..انا مين وهو مين..
بس الراجل ده انا مش بحبه بصراحه..انا بسمع حاجات عن ايام الحكم بتاعه بتخليني اتجنن..من معتقلات وبدايه ظهور زوار الفجر والتعذيب والدوله السياسيه والاتحاد الاشتراكي و...و... و...

يعني عليه ماخد كتير اوي زي ما ليه حاجات حلوه ..زي انه كان دايما في دماغه القوميه العربيه والاتحاد بين العرب وكده..بس الله اعلم هو كان بيعمل كل ده للوحده في حد ذاتها ولا شهره شخصيــــــــــه؟؟؟!!

والحمد لله يا مانا انك اقتنعت بكلامي او جزء منه ع الاقل

لالالالالالالالالالالالالالالالالالالالالا
مين قال كدا ثم حكاية ان الشعبر على مشارف ثوره دا مش كلامى دى احصائيات عالميه و ناس بتابع نبض الشعب
انتا مش شايف ايه اللى بيحصل فى البلد كل شويه يطلع عمال شركه معينه و يعملو مظاهره و اعتصام
كل شويه فئه من الناس تتظاهر فى مكاتن شكل
احنا مش بنصبر كتير و لو انتا دارس كويس من ايام خورشيد و انتا تعرف اننا مش بنسكت على الوحش
مبارك مش كل الناس بتكرهه فى ناس كتير بتحبه كتير جدا و ناس كتير شيفاه بطل عمل حاجات كويسه كتير
علشان كدا مفيش تحرك قوى من الشعب

عبد الناصر يعتبر بطل فى وقته
فى وقته كان الشعب المصرى به الخونه اكتر من الاصدقاء شويه معاه و شويه مع الانجليز و شويه مع الفرنسيين و اليهود جنبه و امريكا و روسيا بيلعبو عليه و الاخوان مش سيبينه فى حاله فكان لازم تكون فى شده مع فئه معينه
طبعا ايامه مكنش فى تلفزيون او اى حاجه الشعب او الفلاح البسيط كان يعرف ان جمال دا
هو اللى خلاه عنده ارض و خلاه يعرف انه مصرى و خلاه غنى
و رفع عنه الظلم علشان دا الراجل دا هو اللى بدا يضع مصر عبى الخارطه
علشان كدا برضو مصر كلها كانت فى حالة ذهول و حزن كبير لما مات لان اللى مات دا عمل كتير للفقير قبل الغنى

سيبنا من عبد الناصر وايامه...اذكروا محاسن موتاكم..ربنا يرحمه ويرحمنا جميعا...

خلينا بقه في اللي احنا فيه ..وفي الراجل اللي اتولدنا ونشانا وشبينا وقرنا نشبيب -بل في ناس انا اعرفهم شابو بالفعل- وهو لسه بيحكم...

اخواتنا اللي بيعتصموا دول بيعتصموا ليه؟؟
عشان كام ملطوش زياده..دا كل االلي هاممهم..مش في بالهم ان البلد بتروح من ولادهم بعد كده...هم مش في دماغهم..
الحكومه نجحت في انها تخلي كل همهم هو المم ولبس العيال وانه مينمش جعان...
الحكومه احبطت الشباب لدرجه انه بقي يكسل يقوم يدور علي شغل..

شوف خبراء العدل بقالهم قد ايه معتصمين..قعدو اكتر من شهر ونص معتصمين ومحدش عبرهم..بدرجه بجد انا مبقتش اتابع
اتعودت انهم معتصمين ومحدش معبرهم..الحكومه نجحت في انها تخايني متابعش المشكله اصلا...

وارجع وافكرك بكلام د/ابراهيم رشوان في اللي بيتعمل فينا..من دخول الدراسه للميد تيرم لنص السنه للميد تيرم لاخر السنه..
تعدي منك السنه زي الحلاوه وانت ولا انت حاسس بحلجه..وتبقي زي المغفل ومعزول عن كل العالم حواليك

ايــــــــــــــــــــــــــــــــــــــــــــــــــــــــــــــــــــــــــــــــــه

ربنا يسامحهم بقه
-حتي الكلمه دي سلبيه بس ادينا بنطلع غلنا-

خلينا بقه في اللي
احنا فيه ..وفي الراجل اللي اتولدنا ونشانا وشابينا وقرنا نشبيب -بل في
ناس انا اعرفهم شابو بالفعل- وهو لسه بيحكم...

طب احنا هنعمل ايه الراجل كتر خيره غير نظام الدستور بدل ما كنا بنقول لا او نعم بقينا نختار من اكتر من واحد بس بردو الشعب بيختاره لان الشعب اكتريته متعرفش غيره و انا و انتا كنا لسه منعرفش النظام ماشى ازاى او معانا بطاقه انتخابيه
و سيبك من ان الانتخابات الاخيره اتزورة لانى معتقدش دا هتتزور ليه هو كان فى منافس اصلا كل واحد طالع بكام الف صوت و هو معاه ملايين الاصوات و صدقنى و انا كنت شايف تقريبا السنطه كلها و دى مش مركز صغير الكل كان داخل لمبارك بس لا طربوش ولا غيره
دلوقتى انتا شايف رجل فى الدوله يستطيع انه يكون مكانه و الشعب يعرف و يثق فيه مفيش غسر واحد\ بس ؟

فالراجل ملوش ذنب احنا اللى جبنا دا كله لنفسنا
ثم لا تنسى ذكر الايه الكريمه
(يمكرون و يمكر الله و الله خير الماكرين )

ايوه الحد الادنى من الرزق اهم من التفكير فى اى شيى تانى الكام ملطوش دول متوقف عليهم اسره كامله اللى هيا جزء من المجتمع فدا يعطيهم الحق فكدا
و كويس انهم بيعترضو على حاجه و ينجحو
لما يلاقو قوة يومهم و دا اهم شيى بعد كدا يقدرو يفكرو فى اى شيى تانى
الحكومه ان نجحت فى كدا فاحنا كمان ساعدناها كتير جدا و للاسف معظم الناس فاكره ان الكلام فى السياسه او النظام ميصحش .........يعنى حاجه سلبيه بقت جوانا
لكن الشباب زى ما انتا شايف الكافى و النت و اللعب و السجائر و البنات بزمتك دول هيفكرو فى البلد دى امته
معتش حد بيفكر فى البلد دى الا ما قل
اما خبراء العدل كل ما ينفذلهم طلب يطلعو بواحد تانى فسيبك من الناس دى و يا ريت يكونو عارفن هما بيعملو ايه

اما حبيبنا ابراهيم رشوان فاطمنك ان الراجل دا هيقوم معانا باحلى واجب فى كل الامتحانات اللى انتا قولة عليها دى

الارجل ده هيظبطتنا السنه الجايه..اوعدك هنتظبت احلي تظبيـــــــــــــــــــــــــط
هرد عليك المره الجايه يا مانا
معلش لازم اقوم
وكل سنه وانت طيب يا حبيبي

و انتا طيب خد راحتك
و اشحن بقى خلينا نسمع صوتك

مــانــــــاااااااااااااا

فاااااااااااااااااااااكر ؟؟
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
مش قاااااااااااااااادر

ياه
المنتدى دا وحشنى

يا ابني انا كل فتره كنت بدخل عليه كده اكتب كومنت لنفسي وامشي

انا كمان كنت بدخل ابص و امشى
كنت الاقى عدد من الزوار دايما