بلياتشو قال إيه بس فايدة فنونى ؟ وتلات وقق مساحيق بيلوّنونى والطبل والمزمامير وكتر الجعير إذا كان جنون زبونى زاد عن جنونى !!عجبى
حتة محارة وجدتها فى يوم لقيةّ قالت لى شوف كيف الطبيعة شقية ؟ نظرت للكهف اللى فيها ولقيت إن الطبيعة كمان .. لا أخلاقية !!عجبى
ياللى انت بيتك قش مفروش بريش تقوى عليه الريح . يصبح مفيش عجبى عليك حواليك مخالب كبار وما لكش غير منقار وقادر تعيش !!عجبى
كيف شفت قلبى والنبى يا طبيب هَمَد ومات والا سامع له دبيب قاللى لقيته مختنق بالدموع ومالوش دوا غير لمسه من إيد حبيب !!عجبى
حدوته عن جعران وعن خُنفسه اتقابلوا حَبّوا بعض ساعة مِسَا ولا قالهم حد اختشوا عيب حرام ولا حد قال دى علاقة متدنسة !!عجبى
زحام وأبواق سيارات مزعجة إللى يطول له رصيف .. يبقى نجا لو كنت جنبى يا حبيبى أنا مش كنت أشوف إن الحياة مُبهجة ؟ !!عجبى
ولدى إليك بدل البالون ميت بالون انفخ وطرقع فيه على كل لون عساك تشوف بعنيك مصير الرجال المنفوخين فى السترة والبنطلون !!عجبى
برّه القزاز كان غيم وأَمطار وبرق ما يهمنيش ـ أنا قلت ـ ولا عندى فرق غيّــرت رأيـى بعد ساعـة زمـان وكنت فى الشارع .. وفى الجزمة خرق !!عجبى
عينى رأَت مولود على كتف أُمه يصرُخ تهنِّن فيه يصرخ تضمُّه يصرخ تقول يا بْنى ما تنطق كلام ده اللى ما يتكلمش يا كتر همُّه !!عجبى
لا تجبر الإنسان ولا تخيّره يكفيه ما فيه من عقل بيحيَّره اللى النهارده بيطلبه ويشتهيه هو اللى بكره ح يشتهى يغيّره !!عجبى
ولدى نصحتك لما صوت اتَنَبح ما تخافش من جِنِّى ولا من شَبَح وإن هبّ فيك عفريت قتيل إسأَله ما دافعش ليه عن نفسه يوم ما اندبح ؟ !!عجبى
بين موت وموت ... بين النيران والنيران ع الحبل ماشيين الشجاع والجبان عجبى عَلادى حياة .. وياللعجب إزاى أنا ـ يا تخين ـ بقيت بهلوان !!عجبى
الدنيا من غير الربيع ميّته ورقة شجر ضعفانة ومفتته - لأ يا جدع غلطان تأمّل وشوف زهر الشتا طالع فى عز الشتا !!عجبى
حاسب من الأحزان و حاسب لها حاسب على رقابيك من حبلها راح تنتهى و لابد راح تنتهى !! مش أنتهت أحزان من قبلها !!عجبى
قالوا الشقيق بيمص دم الشقيق والناس ما هيَّاش ناس بحق وحقيق قلبى رميته وجبت غيره حجر داب الحجر .. ورجعت قلبى رقيق !!عجبى
غمض عينيك وارقص بخفة ودلع الدنيا هى الشابّة وانت الجدع تشوف رشاقة خطوتك تعبدك لكن انت لو بصيت لرجليك .. تقع !!عجبى
ورد ف ورق سلوفان يا حلوة اهديلك ؟ والاّ انقله بالطين فى شتلة واجيلك ؟ الأولانى لــو وحـــا بحنـانـى عجبى على التانى بإيه يوحيلك ؟ !!عجبى
كان فيه زمان سِحليَّة طول فَرْسَخين كهفين عيونها وخَشْمَها بَربخين ماتت .. لكين الرعب لم عمره مات مع إنه فات بدل التاريخ تاريخين !!عجبى
يا عندليب ما تخافش من غنوتك قول شكوتك واحكى على بلوتك الغنوة مش حتموتك إنما كتم الغنا هو اللى ح يموتك عجبى !!
لو فيه سلام فى الأرض وطمان وأمن لو كان مفيش ولا فقر ولا خوف وجبن لو يملك الإنسان مصير كل شئ أنا كنت أجيب للدنيا ميت ألف ابن عجبى !!
أهوى الهوى وهمس الهوى فى العيون وبسمة المغرم . ودمعة الحنون وزلزلات الحب نهـد الصبـا أكون أنا المحبوب . أو لا أكون عجبى !!
حتة محارة وجدتها فى يوم لقيةّ قالت لى شوف كيف الطبيعة شقية ؟ نظرت للكهف اللى فيها ولقيت إن الطبيعة كمان .. لا أخلاقية عجبى !!
كام اشتغلت يا نيل في نحت الصخور مليون بئونة و ألف مليون هاتور يا نيل انا ابن حلال و من خلقتك و ليه صعيبة علي بس الأمور و عجبي !!
دخل الشتا و قفل الببان عالبيوت و جعل شعاع الشمس خيط عنكبوت و حاجات كتير بتموت فى ليل الشتا لكن حاجات اكتر بترفض تموت عجبى !!
يسرا مشرفة قسم الموضوعات العامة+القسم الديني
عدد الرسائل : 4501 العمر : 35 تاريخ التسجيل : 26/06/2008
موضوع: رد: رباعيات - صلاح جاهين الأحد مارس 08, 2009 8:05 pm
عجبتنى كلمة من كلام الورق النور شرق من بين حروفها و برق حبيت اشيلها فى قلبى قالت حرام دانا كل قلب دخلت فيه اتحرق عجبى !!
خوض معركتها زي جدك ما خاض صالب.. و قالب شفتك بإمتعاض !! هي كدة.. ما تنولش منها الامل غير بعد صد و رد ووجاع مخاض عجبي
يأسك و صبرك بين ايديك.. وانت حر تيأس .. ما تيأس.. الحياة راح تمر !! أنا دقت من ده ودا.. عجبي لقيت الصبر مر .. و اليأس برضك مر عجبي
ايه اللي خدته من مرور السنين؟؟ يا قلبي الا دمعتك.. و الأنين بتئن.. و ترجع و بتفرح و ترجع تحن!! مع ان مش كل البشر فرحانين!! عجبي
أحسن ما فيها العشق و المعشقة و شويتين الضحك و التريقة شفت الحياة .. لفيت.. لقيت الألذ تغييرها !! و ده يعني التعب و الشقا عجبي!!
جالك أوان .. ووقفت موقف وجود!! يا تجود بده يا قلبي.. يا بده تجود ما حد يقدر يبقي علي كل شيء مع ان -عجبي- كل شيئ موجود عجبى
سمعت نقطة مية جوة المحيط بتقول لنقطة.. متنزليش في الغويط أخاف عليكي من الغرق... قلت انا ده اللي يخاف من الوعد.. يبقي عبيط! عجبى
تسلم يا غصن الخوخ يا عود الحطب ييجى الربيع تطلع زهورك عجب و انا ليه بيمضى ربيع و ييجى ربيع و لسه برضك قلبى حتة خشب عجبى!!
فارس بعيد جوه الدروع الحديد رفرف عليه عصفور و قاله نشيد منين منين...و لفين لفين يا جدع قال من بعيد و لسه رايح بعيد عجبى !!
صوتك يابنت الايه كأنه بدن يرقص يزيح الهم يمحى الشجن يا حلوتى و بدنك كأنه كلام كلام فلاسفة سكروا نسيوا الزمن عجبى!!
انشد يا قلبى غنوتك للجمال و ارقص فى صدرى من اليمين للشمال ماهوش بعيد تفضل لبكره سعيد ده كل يوم فيه الف الف احتمال عجبى!!
ايديا فى جيوبى و قلبى طرب سارح فى غربة بس مش مغترب وحدى لكين ونسان و ماشى كده وبابتعد....ماعرفش....او باقترب عجبى!!
يا ميت ندامة ع القلوب الخلا لا محبة فيها و لا كراهة و لا حتى يا قلبى الحزن ماعدش فيك معلهش..لك يوم برضه راح تتملا عجبى !!
حقرا و فوق كوكب حقير محتقر فى الكون تكون دنياكو ايه يا بقر رملاية من صحرا؟ لكين ايش تقول و الكون بحاله جوه عقل البشر عجبى!!
علقت فى المسمار قناع مهزلة و معاه قناع مأساة بحزنه ابتلى بصيت لقيتهم يشبهوا بعضهم و اهو ده العجب يا ولاد و الا فلا عجبى!!
اوقات افوق و يحل عنى غبايا و اشعر كأنى فهمت كل الخبايا و افتح شفايفى عشان اقول الدرر ماقولش غير حبة غزل فى الصبايا عجبى!!
eng_mody إدارة المنتدى
عدد الرسائل : 3631 العمر : 33 تاريخ التسجيل : 24/07/2008
موضوع: رد: رباعيات - صلاح جاهين الأحد مارس 08, 2009 8:14 pm
بااااااااااااس...وصلنا لعم الكل صلاح جاهين.. عمنا كلنا.. الراجل ده مش محتاج اني اتكلم عليه انا كنت بسمع برنامج للرباعيات دي علي اذاعه الشرق الاوسط بجد كلام تحفه واظن واضح من العينه دي...
ومعتقدش اني هعرف اقتبس حاجه المره دي بالذات...
شكرا يا يسرا بجد علي الموضوع الاكتر من رائع....
يسرا مشرفة قسم الموضوعات العامة+القسم الديني
عدد الرسائل : 4501 العمر : 35 تاريخ التسجيل : 26/06/2008
موضوع: رد: رباعيات - صلاح جاهين الأحد مارس 08, 2009 8:17 pm
طبعا للامانه انا مش قريت ده كله انا قريت مقتطفات ومش محتاجه اقراه كله علشان اعرف انه يستاهل يتحط في توبيك اكيد كله رائع وميرسي يا مودي
عدل سابقا من قبل يسرا في السبت فبراير 20, 2010 10:45 pm عدل 2 مرات
القائد العام م/تامر الكوراني -المعيد بقسم مدني
عدد الرسائل : 52 تاريخ التسجيل : 03/11/2007
موضوع: رد: رباعيات - صلاح جاهين الإثنين مارس 09, 2009 1:29 am
تسلمى يا يسرا
انا من عشاق الرباعيات لجاهين ودى تجربة لى فى كتابة الرباعيات
وسط مليون صاحب و عايش دايما وحيد اغرق فى شبر ميه و الناس فكرانى عنيد ادوب بكلمة حلوة و احلم مع لحن غنوة و ابكى فى ليلة عيد
يسرا مشرفة قسم الموضوعات العامة+القسم الديني
عدد الرسائل : 4501 العمر : 35 تاريخ التسجيل : 26/06/2008
موضوع: رد: رباعيات - صلاح جاهين الإثنين مارس 09, 2009 10:07 am
اقتباس :
وسط مليون صاحب و عايش دايما وحيد اغرق فى شبر ميه و الناس فكرانى عنيد ادوب بكلمة حلوة و احلم مع لحن غنوة و ابكى فى ليلة عيد
حلوه جدا والله يا باشمهندس مش مجامله بس احساس صعب اوي فعلا تسلم ايدك ومنور كالعاده